Reykjavík

„Þetta minnti mann á leiki erlendis“

Leikur KR og Víkings Reykjavíkur í Bestu deild karla í fótbolta var best sótti leikur síðari ára. Alls mættu 4.337 manns en svo margir hafa ekki mætt frá árinu 2014. Enginn leikur hefur farið yfir 4.000 manns frá úrslitaleik FH og Stjörnunnar. Fulltrúar Íslensks toppfótbolta, sem heldur utan um efstu deildir fótboltans hér landi, telja að stemningin hafi verið eins og á leik erlendis. Þeir ræddu mætinguna í deildinni í ár, hvort að leiktíminn hafi haft áhrif og rýndu hvað hafði áhrif á mætinguna. Birgir Jóhannsson, framkvæmdastjóri ÍTF, og Björn Þór Ingason markaðsstjóri fóru yfir málin. „Þetta var stórleikur og það vissu það allir. Það var gríðarlega mikið undir. Þannig að bæði félögin og við settum í gang smá extra umfjöllun og kynningu í aðdraganda leiksins. Það heppnaðist frábærlega en allur heiðurinn fer til KR-inga að hafa undirbúið þetta svona gríðarlega. Það var virkilega gaman að mæta þarna í gær og sjá umgjörðina. Að upplifa það að labba á völlinn, þegar hópur af fólki var að labba á völlinn á sama tíma. Þetta minnti mig á tímann þegar maður var að fara á landsleiki og leiki erlendis, hreinlega,“ sagði Birgir. Kom fjöldinn á óvart? KR-ingar töluðu í aðdraganda leiks um að búist væri við um 3.000 manns. En raunin varð að 4.337 manns mættu, sem er það langmesta síðustu ár. „Já og nei. Maður vissi að það yrði góður fjöldi en 4.300 komu mér skemmtilega á óvart, getum við sagt.“ Ekki hægt á Víkingsvelli Björn Þór telur að áhugavert hefði verið að sjá hver raunverulegur áhugi væri á stórleikjum síðustu ár. Til að mynda var uppselt á úrslitaleik Breiðabliks og Víkings 2024. Einnig seldist upp á upphafsleik deildarinnar í ár, sem var sá sami. KR völlurinn getur hins vegar tekið á móti fleirum „Þessir stórleikir sem hafa verið undanfarin ár hafa verið á Víkingsvelli. Sá völlur er bara flottur eins og er, en því miður tekur hann ekki við svona mörgum. Það eru bara 2.500 manns að hámarki. Þannig maður veit aldrei, til dæmis eins og Víkingur - Breiðablik 2024, hvað það hefðu raunverulega margir mætt ef við hefðum verið á öðrum velli sem getur tekið á móti fólki, hvort sem það er í stæðum eða sætum.“ „Þannig að það var gaman að þessi leikur var á þessum velli, sem gat raunverulega tekið á móti svona mörgum,“ sagði Björn Þór. Mætingin góð í ár þrátt fyrir HM ár „Mætingin hefur verið góð. Við erum ekki með algjörlega fullkomið kerfi sem uppfærist strax eftir leik. Við verðum alltaf að kalla eftir tölunum. En það verður betri mæting karlamegin í deildinni. Kvennamegin erum við á pari. Þetta er mjög gott miðað við hvernig þetta hefur verið undanfarin ár,“ segir Birgir. Hefði verið betra að leika á öðrum tíma? Leikurinn átti upprunalega að fara fram á sunnudeginum en var færður til þriðjudags. Þar sem engin fljóðljós eru á KR vellinum þurfti að leika snemma. KR-ingar fengu það í gegn að fresta leiknum um hálftíma, frá 17 til 17:30. En hefðu í raun enn fleiri mætt á leikinn ef hann hefði verið á öðrum tíma? „Auðvitað vantar flóðljós. Það var sjónvarpið sem stýrði því hvenær leikurinn gat farið fram. Það var í síðasta lagi 17:30. Það voru bara birtuskilyrði sem stýrðu því, vegna þess að flóðljósin eru ekki komin upp. Það var samt ekki að sjá að það vantaði eitthvað fólk á völlinn. Hann var algjörlega smekkfullur en ég held samt að það hefðu verið aðeins fleiri ef hann væri seinna. En á móti hentar þetta barnafjölskyldum. Þarna ertu ekki að koma heim með krakkana rúmlega níu. Það eru kostir og gallar við allt saman,“ segir Birgir. Kvöldmatarleitið alltaf best ÍTF segir þó að öll gögn bendi til þess að leiktíminn í kringum 19:00 sé besti tíminn. „En við höfum auðvitað séð dæmi um annað. Það er þessi leikur og mér er minnisstætt er leikur sem FH spilaði mjög snemma, en allt var undir. Það var hörku mæting en þetta litast alltaf af spennustiginu fyrir leik og hvað er í húfi,“ sagði Birgir. „En þetta er samtal milli okkar og sjónvarpsins. Í draumaheimi hefði þetta kannski verið 18:30. En við vinnum þetta líka með félögunum,“ bætti Björn Þór við. Hvernig þróast þetta í úrslitakeppni? Það er mikil spenna í deildinni eins og er, en það er ein umferð eftir að hefðbundinni deildarkeppni. Víkingar eru þó enn með átta stiga forskot á KR sem er í öðru sæti. Þá er mikil spenna varðandi hvaða lið verða í efri eða neðri hlutanum, en tólf liða deildin skiptist í tvennt. „Það hefði verið frábært fyrir deildina ef KR hefði unnið Víkinga í gær. Bara fyrir þann hlutlausa og fyrir keppnina sjálfa. En það eru náttúrulega ennþá sex leikir eftir og 18 stig í pottinum. Það getur allt gerst í þessu. Við erum líka með hörkuspennu í neðri hlutanum. Svo er líka þannig að áður fyrr var ekki mikil spenna um miðja deild en út af lokaumferðinni núna, fyrir skiptingu, erum við með aukna spennu í þessu. Hvort þú sért uppi eða niðri. Það er rosa slagur á milli þriggja liða, Stjörnunnar, ÍA og Vals, um að komast í efri hlutann. Alltaf erfitt að keppa við HM Heimsmeistaramót karla í fótbolta var í sumar. Það setur alltaf strik í reikninginn varðandi mætingu á íslenska fótboltaleiki. Þrátt fyrir það hefur deildin verið á pari varðandi mætingu. Það er að segja, mætingin féll ekki líkt og síðustu stórmótaár. Það á við um bæði Bestu deild kvenna og karla. „Við erum líka á HM ári. Það er alltaf erfitt að keppa við stórmót í fótbolta en samkvæmt okkar erum við á pari bæði í karla og kvenna. Það er mjög ánægjulegt þegar það eru stórmót.“ Viðburðir segja sitt. Félögin í Bestu deild kvenna hafa sett saman dagskrá gagngert til að slá áhorfendamet sín. Það gekk upp hjá bæði Breiðablik og FH í ár. „Við fögnum því náttúrulega þegar félög taka sig saman og gera eitthvað extra. Við höfum séð það sérstaklega kvennamegin. Breiðablik og FH voru með sérstakan dag. Blikar vildu slá áhorfendametið hjá sér, sem tókst. FH gerði slíkt hið sama, og það tókst líka. Við hvetjum félögin til þess að búa til sérstaka viðburði í kringum heimaleikina sína. Það hefur sýnt sig að með samstilltu átaki mæta fleiri á völlinn. Það þarf svolítið, eins og alltaf, að draga fólk á völlinn með einhverjum sérstökum viðburðum,“ segir Birgir. Miðað við höfðatölu Bestu deildirnar hafa síðustu ár komið afar vel út í samanburði við aðrar deildir þegar kemur að mætingartölum miðað við höfðatölu. Sumir Íslendingar elska höfðatöluna, aðrir hata hana, en öll þekkjum við hana afar vel. „Við erum með dúndurmætingu miðað við fjölda landsins,“ segir Birgir. Besta deild kvenna hefur verið efsta deildin á heimsvísu þegar kemur að því. Karladeildin hefur verið í og við toppsætin. Það má vænta þess að sú tölfræði sé á leiðinni. „Fólki finnst oft þreytt að tala um per capita, en raunveruleikinn er sá að við getum ekki flutt inn fólk til að horfa á fótboltaleiki.“ „Raunveruleikinn er sá að við þurfum að nota þá sem eru til staðar hér á landinu til að sækja um leiki. Það er bara það sem við höfum úr að moða. Þannig að mér finnst þetta sanngjarn samanburður í því samhengi,“ segir Björn Þór að lokum.

Local media